70. CASARES PASEALEKUA / PASEO DE CASARES

Auzoa: Altza

Casares pasealekua Pasaiako portuko zeharbidea eta Buenavista hiribidearen artean dagoen biribilgunean hasten da.

 

Buenavista auzunetik gora eginez, Arriberri eta Arrizar etxaldeen artean bukatzen da Casares pasealekua.

 

Casares abizena Altzako garrantzitsuenetakoa izan da Erdi Arotik. Casarestar batek Navas de Tolosako guduan parte hartu zuen 1212an eta Altzako dokumentuetan Casares abizena 1390tik da ezaguna.

 

Casares leinuaren armarria Altzako Casares kulturetxean.

Casares oinetxea Arriberri auzunean kokatzen da. XVIII. mendeko eraikin hau 1986an eraberritu zuten eta Altzako kulturetxea da gaur egun.

Casares kulturetxea

 

 

Casares pasealekuaren izendapena 1973ko abuztuaren 31an onartu zen. Plaketan Kasares pasealekua jartzen duen arren, euskarazko izen ofiziala Casares pasealekua da.

 

EGUNERAKETA: Altzako Historia Mintegiak argitaratu berri du Casares pasealekua 1936an izendatu zuela Altzako udalak Ignacio Casares doktorearen omenez.

https://x.com/AltzakoHM/status/1859167462224261311?t=3SVbu6Rs-384inlrplHyVg&s=19
 

69. AITA LARROCA KALEA / CALLE DEL PADRE LARROCA

Auzoa: Gros

 

Aita Larroca kalea Mirakruz kalean hasten da eta Biteri plazan amaitzen da, San Inazio elizaren aurrean.

 

 

Jose Maria Larroka Estalaren gurasoak 1813an, hiriaren suntsiketatik ihes eginda, Altzatik hurbil zegoen Suletenea baserrian babestu ziren. Bertan jaio zen Jose Maria irailak 10ean. 1829an domingotarren ordenan sartu zen, San Telmo komentuan, eta 1834an Burgosera joan zen.

San Telmo komentuaren (gaur egun San Telmo Museoa) klaustroa. Argazkia: Wikimedia Commons https://commons.wikimedia.org/wiki/File:San_Sebastian_-_San_Telmo_20.jpg

 

Lehen karlistaldian ordena erlijiosoen itxialdia agindu zen eta aita Larroca Azpeitiko domingotarren komentuan babestu zen, bertan apaiz ordenatu zutelarik. Gerra amaieran 1839an Frantziara ihes egin zuen. 1844an Espainiara itzuli zen eta ordena berregiteari ekin zion.

 

Domingotarren gurutzea. Irudia: Wikipedia

https://es.wikipedia.org/wiki/Archivo:Cr.domenicana.JPG

 

 

1869an Erromara joan zen. Ordenako hainbat kargu garrantzitsu bete zituen eta 1879an Filipinetara joan zen bisitari orokor gisa eta bertan zegoela domingotarren Hierarka Gorena izendatu zuten. 1880ko otsailaren 1ean eskuratu zuen kargua. 1891ko urtarrilak 8an hil zen Erroman.

Aita Larrocaren grabatua. Irudia: Wikipedia

https://es.wikipedia.org/wiki/Archivo:Jose_Maria_Larrokaren_grabatua.png

 

 

Aita Larroca kalearen izendapena 1895ko uztailaren 23an onartu zen.

 

 

 

 

68. GREGORIO ORDOÑEZ KALEA / CALLE DE GREGORIO ORDÓÑEZ

Auzoa: Amara Berri

 

 

Gregorio Ordoñez kalea Irun plazan hasten da eta aldapan gora doa Loiolako Erribera aldera, ezkerrerako bihurgunea eginez. Renfeko trenbidearen gainetik pasatzean Barcelona hiribidean bilakatzen delarik.

Gregorio Ordoñez Fenollar 1958ko uztailaren 2an jaio zen Caracasen, Venezuelako hiriburuan. Umetan familiarekin Donostiara joan zen. Consuelo arrebarekin batera Opus Dei erakundearen gazte taldeetan jardun zuen eta kazetaritza ikasi zuen Nafarroako Unibertsitatean.

 

Gregorio Ordoñez haurra zenean. Irudia: Gregorio Ordoñez Fundazioa

https://fgregorioordonez.com/gregorio-ordonez/

Nuevas Generaciones, Alianza Popular koalizioaren gazte sailean sartu eta 1983an zinegotzi hautatu zuten Donostian. 1987an turismo eta jaietako zinegotzi izan zen eta 1991an hirigintzako zinegotzi. Gainera, 1990an Eusko Legebiltzarkide izendatu zuten.

 

Gregorio Ordoñez udal ekitaldi batean Irudia: Gregorio Ordoñez Fundazioa

https://fgregorioordonez.com/gregorio-ordonez/

 

1995ko urtarrilak 23an, parte zaharreko La Cepa tabernan, Maria San Gil eta Enrique Villar idazkariekin batera udal hauteskundeetako kanpaina prestatzen ari zela, Frantzisko Xabier Gartzia Gaztelu "Txapote" buru zuen ETAko komando batek tiro batez hil zuen Gregorio Ordoñez.

1993ko ekainak 15ean kale hau Santiago kalea bezala izendatu zuten, baina 1995ko otsailak 13an Gregorio Ordoñezen izena eman zioten kale honi. Gaur egun Loiolako Erriberan badago Santiago izeneko plaza bat.

67. NIKANOR ZABALETA PLAZA / PLAZA DE NICANOR ZABALETA

Auzoa: Intxaurrondo

 

Nikanor Zabaleta plaza Baratzategi eta Buztintxulo kaleen eta Galizia eta Arjel pasealekuen artean kokatzen da.

 

Nikanor Zabaleta 1907ko urtarrilak 7an jaio zen Donostian. 1914an aitak harpa bat erosi zion eta musika ikasketak hasi zituen Donostiako kontserbatorioan. Madrilen eta ondoren Parisen Marcel Tournierrekin burutu zituen harpa ikasketak.

Nikanor Zabaleta kontzertu bat ematen 1967an. Argazkia: Kutxateka

https://www.kutxateka.eus/Detail/objects/229546/s/12

 

Madrilgo kontserbatorioko irakasle plaza lortzeko saiakeran huts eginda, Nikanor Zabaleta kontzertuak ematen hasi zen mundu osoan, fama handia lortuz. 1950an Puerto Ricon Graciela Torres ezagutu zuen, 1952an ezkondu zirelarik Donostiara bueltatuz.

 

Nikanor Zabaletari omenaldia Donostiako udaletxean 1980ko hamarkadan. Argazkia: Kutxateka

https://www.kutxateka.eus/Detail/objects/866887/s/0

 

Harparen erabilera bultzatu zuen, berritasunak ezarriz instrumentu honetan. Zortzi pedaleko harpa erabili zuen lehen aldiz, ohiko zazpi pedalekoaren ordez. XVI-XVIII mendeetako musikari buruzko ikerketak ere burutu zituen. 1993ko apirilak 1ean hil zen Puerto Ricon.

Harpa baten pedalak. Argazkia: Wikimedia Commons

https://commons.wikimedia.org/wiki/File:Harp_pedals_bigger.jpg

 

Nikanor Zabaleta plazaren izendapena 1993ko ekainak 15ean onartu zen.

 

 

66. MIRAMON PASEALEKUA / PASEO DE MIRAMON

Auzoa: Miramon-Zorroaga

Miramon pasealekua Begiristain doktorearen pasealekuan hasten den bide sigisagatsu bat da. Illunbe aisialdi konplexuaren ondotik pasatzen da.

Miramon pasealekuak Euskadiko Orkestraren egoitzaren ondotik jarraitzen du, Gipuzkoako Batzar Nagusien ondoren Poliklinikako biribilgunera iritsi arte.

 

Poliklinikako biribilgunean bi bide ezberdin hartzen ditu Miramon pasealekuak. Bat aldapan behera doa Batzar Nagusien egoitzaren beste aldetik. EITBren eraikinaren ondotik pasa eta Tandem eraikinaren inguruan bukatzen da,irteerarik gabe.

 

Bestea Mikeletegi pasealeku aldera doa, parke teknologikoaren eraikin batzuen eta Sanitas zaharren egoitzaren ondoan.
 

Miramon parkean sartzen diren bide ugari daude Miramon pasealekuan zehar. Horietaz gain, oinezkoentzako beste bide bat ere badago, Cesar Chicote eta Miguel Pelay Orozko kaleen arteko biribilgunera daramana.

Bertan Miramon-Txara baserria zegoelako izendatu zuten Miramon pasealekua. Miramont familia gaskoia Erdi Arotik izan da garrantzitsua Donostian. Antiguako San Sebastian elizaren sorreran parte hartu omen zuten eta Miramont familiako kide batzuk alkate izatera iritsi ziren.

Miramon Nazioarteko Espazio Estaziotik ikusia.

Argazkia: Wikipedia https://eu.wikipedia.org/wiki/Fitxategi:Miramon,_Donostia,_Euskal_Herria.jpg

Miramont izen gaskoia Miramon bilakatu zen, eta haien lurrak 1547an Miramon Mendia bezala ezagutzen ziren. Familiaren Miramon-zar baserria zegoen tokian gaur egun EITBren eraikina dago.

 

Miramon-zar baserria. Argazkia: aiete.net http://www.aiete.net/2021/07/los-toros-de-miramon/

 

 

Miramon pasealekuaren izendapena 1988ko martxoak 23an onartu zen.