225. AIERBE PLAZA / PLAZA DE AIERBE

Auzoa: Loiola

Aierbe plaza Aintzieta pasealekuaren eta Felisa Martin Bravo hiribidearen artean dago, Kantoizar plazaren ondoan.

Aierbe plazaren izena auzoko bertsolari ezagunak ziren Bartolo eta Joxe Aierbe aita-semeengatik dator. Bartolo Aierbe Urrestarazu Gaintzan jaio zen 1906an. Uba bidean dagoen Ubegi baserrira joan zen bizitzera. 1997an hil zen Donostian.

Joxe Aierbe Iraola Ubegi baserrian jaio zen 1934ko urtarrilaren 20an. Martuteneko Arantzazuko Ama ikastolaren sortzaileetako bat izan zen. 2012ko urriaren 5ean hil zen Donostian.

Aierbe plazaren izendapena 2017ko urriaren 26an onartu zen.

224. ALAIALDE AUZUNEA / GRUPO ALAIALDE

Auzoa: Egia

Alaialde auzunea Egia galtzadaren, Jaialai kalearen, Alaiondo auzunearen eta Xabier Aizarna pasealekuaren artean dago.

Alaiondo auzunearen kasuan azaldu genuen bezala, Jaialai kalearen ondoan egoteagatik hartu zuen izena auzune honek ere. Jaialai kalearen izena bertan 1887tik 1932 arte egon zen Jai-Alai frontoiarengatik dator.

Jai-Alai frontoia 1917an. Argazkia: Kutxateka https://www.kutxateka.eus/Detail/objects/69591/s/204

Alaialde auzunearen izendapena 1982ko maiatzaren 13an onartu zen.

223. MIRAKRUZ KALEA / CALLE DE MIRACRUZ

Auzoa: Gros

Mirakruz kalea Euskadi plazan hasten da eta Galtzara Nagusia eta Ategorrieta hiribidearen elkargunean amaitzen da, Euskal Herria plazaren ondoan.

Serapio Muxikak "Las Calles de San Sebastián" liburuan aipatzen duenez, kale hau Mirakruz gainera zeraman bidearen parte zenez, hala izendatu zuten. Gain honetatik Lezoko Gurutze Santuaren edo Kristo Santuaren basilika ikusten zelako jarri omen zioten Mirakruz izena.

Lezoko Gurutze Santuaren basilika. Argazkia: Wikimedia Commons

https://commons.wikimedia.org/wiki/File:Lezo_-_Bas%C3%ADlica_del_Santo_Cristo_09.jpg

Mirakruz kalearen izendapena 1881ko apirilaren 23an onartu zen.

222. ZORROAGA PASEALEKUA / PASEO DE ZORROAGA

Auzoak: Amara Berri, Loiola

Zorroaga pasealekua Aita Donostia plazan hasten da eta Loiola biribilgunean amaitzen da.

Desagertutako Zorroaga edo Zorrua baserriak ematen dio izena pasealekuari. Egian zegoen miserikordia etxea lekualdatu eta Zorroaga, Tximistegi edo Tximitegi eta Maisumartiarena baserriak zeuden lurretan Victoria Erreginaren Babesetxea eraiki zuten.

Zorroaga baserria. Irudia: XIX. mendeko albuma

https://www.gipuzkoa.eus/eu/web/19mendekoalbuma/d/87886046

Zorroaga pasealekuaren izendapena 1962eko maiatzaren 21ean onartu zen. Amara-Osinagako zonaldearen urbanizazioa onartzean, pasealekuaren izendapena berretsi zuten 1993ko ekainaren 15ean.