122. EGIA GALTZADA / CALZADA DE EGIA

Auzoa: Egia

 

 

Egia galtzada Iztueta kalearen amaieran dagoen biribilgunean hasten da, Zuhaizti parkearen ondoan. Trenbidearen ondotik ibilbide gorabeheratsu bat egiten du, Jaialai kalean amaitu arte, Zubiaurre pasealekuaren hasieran.

Egia auzoak (eta baita galtzadak) bertan zegoen Egia izeneko baserriagatik hartu omen zuten izena. Ez dut baserri horri buruzko informaziorik aurkitu.

1943ko Uliako Gimnastikaren krosa Egia galtzadan.

Argazkia: Kutxateka https://www.kutxateka.eus/Detail/objects/127012/s/24

Jai herrikoiak 1944 urtean Egia galtzadan.

Argazkia: Kutxateka https://www.kutxateka.eus/Detail/objects/349917/s/0

 

 

Egia galtzadaren izendapena 1975ko apirilaren 28an onartu zen.

 

 

121. AITA CLARET PLAZA / PLAZA DEL PADRE CLARET

Auzoa: Gros

Aita Claret plaza Jose Migel Barandiaran eta Zurriola pasealekuen artean dago, Nafarroa hiribidearen hasieran.

Antonio María Claret Sallent de Llobregaten jaio zen 1807ko abenduaren 23an. 1835an apaiz ordenatu zuten Solsonan. 1849an Andre Mariaren Bihotz Guztiz Garbiaren Seme Misiolarien ordena sortu zuen, klaretarrak bezala ezagutua. Orduan Santiagoko Artzapezpiku izendatu zuten Kuban.

 

Claret artzapezpikua Kuban bere lantaldeko kide batzuekin 1853an.

Argazkia: Wikipedia https://es.wikipedia.org/wiki/Archivo:Fotos_Claret612.jpg

 

 

1857an Madrila joan zen Isabel II.a erreginaren aitor-entzule bezala. 1868ko iraultzan Frantziara erbesteratu ziren. Claret 1870ko urriaren 27an hil zen Fontfroideko abadian. 1934an Pio XI.ak beatifikatu zuen eta 1950eko maiatzaren 7an Pio XII.ak santu izendatu zuen.

 

Claret Parisen 1868an. Argazkia: Wikipedia https://es.wikipedia.org/wiki/Archivo:P_Claret241.jpg

 

 

Klaretarrak Donostian hasi ziren Migel Muñoaren euskal ikastetxean klaseak ematen. 1924an Grosera joan ziren eta 1929an inauguratu zuten Mariaren Bihotzaren parrokia eta eskola. 2019an eskola itxi zuten ikasle faltagatik eta 2020an elizak ere bere ateak itxi zituen.

 

 

Aita Claret plazaren izendapena 1950ko maiatzaren 31an onartu zen.

 

 

120. LUISTARREN KALEA / CALLE DE LOS LUISES

Auzoa: Intxaurrondo

 

Luistarren kalea Zubiaurre pasealekuan hasten da, Joseba Zubimendi kalearen eta Alice Gulick parkearen artean.

 

 

Luistarren kaleak goranzko bidea egiten du, Lizardi kalean bukatuz, Gaztelu kalearen azpian.

Gipuzkoako hainbat lekutan izan dira San Luis Gonzagaren, Luistarren, kongregazioak. Hauek gazteen erakunde erlijiosoak ziren, San Luis Gonzaga gazteen patroia da eta. Donostian ere baditugu Luistar Langileen plaza eta San Luis Gonzaga plaza.

Ormaiztegiko Luistarrak 1936an. Argazkia: Eusko Ikaskuntza

https://www.eusko-ikaskuntza.eus/es/fondo-documental/fondo-multimedia/mu-68043/

 

 

Luistarren kalearen izendapena 1982ko maiatzaren 13an onartu zen.

 

 

119. HERIZ PASEALEKUA / PASEO DE HERIZ

Auzoak: Antiguo, Aiete

Heriz pasealekua Matia kalean hasten da.

 

Heriz pasealekuak aldapan gora egiten du ibilbide sigisagatsu batean, apaizgaitegiaren eraikinaren paretik pasatzen delarik.

 

 

Heriz pasealekua Pinu bidea eta Marañon Doktorearen pasealekua hasten diren tokian bukatzen da.

Heriz Pasealekuak Rafael Heriz senatari karlistaren omenez du izena. XIX. mendean, Heriz jaunaren lurretan "Camino Particular de Aranalde a Lugariz" deitutako bidea zegoen. Udalak Heriz jaunari bidea erosi zion eta hamarkada batzuk beranduago bere izena eman zioten bideari.

 

Heriz jaunaren lurren mapa bidearen erosketaren espedientean. Irudia: Donostiako Udala

https://www.donostia.eus/Presidencia/ArchivoGeneralP.nsf/vListadoId/264F659B07EA22C4C1257D32003B7918?OpenDocument&sf=2&id=C671670315425&idioma=eus

 

 

Heriz Pasealekuaren izendapena 1930ko ekainaren 3an onartu zen.