87. OTXOKI PASEALEKUA / PASEO DE OTXOKI

Auzoa: Intxaurrondo

 

Otxoki pasealekua Gabriel Aresti pasealekua, Sibilia kalea eta Baratzategi kalea elkartzen diren bidegurutzean hasten da. Hego Intxaurrondoren eta kale izendegian agertzen ez den Ametzagaina parkearen arteko muga egiten du.

Ondoren, Otxoki pasealekua Intxaurrondoko Guardia Zibilaren kuarteleko lurretan sartzen da, bertara sarbidea debekatua dagoelarik, eta buelta ematen du, kuarteletik irten, Baratzategi kalea gurutzatu eta Galizia pasealekuaren 23 eta 25 zenbakien artean amaituz.

Gaur egungo Otxoki parkearen inguruan zegoen Otxoki baserriak ematen dio izena. XVIII. mendetik ezagutzen zen baserria, sagardotegi eta bolatoki bezala famatua. Otxoki baserria 1973an bota zuten.

Otxoki baserria 1935 aldera. Argazkia: estibaus.info

https://www.estibaus.info/?p=7477&langswitch_lang=eu

 

 

Otxoki baserriaren kokapena gaur egun

 

 

Hego intxaurrondoko baserrien mapa. Irudia: Wikipedia.

https://eu.wikipedia.org/wiki/Fitxategi:Intxaurrondoko_baserriak_18_41_19_230000.jpeg

Otxoki paseaekuaren izenapena 1982ko martxoaren 9an onartu zen.

 

 

86. HARRIA PARKEA / PARQUE DE HARRIA

Auzoa: Altza

 

Harria parkea Herrera pasealekuaren ondoan dago, Erroteta auzunearen parean eta Arrizar auzunearen ondoan. Beheko parte laua dauka pasealekuaren ondoan, aterpe handi batekin, eta goiko partean bidexka eta zuhaitz ugari daude.

Parkearen alde batean toka jokorako gune bat dago. Aterpearen ondoan etxeko langileen omenez egindako eskultura bat dago, 2022an ezarria. 

Harria parkearen izena Altzako Arriaga oinetxetik datorkio, Erdi Arotik ezaguna. Parkearen goiko partean 1987an sute batek suntsitutako Arriaga Zar baserria zenaren horma bat dago, armarria kontserbatzen duena. Honek ere ondoko Arrizar auzuneari ematen dio izena.

 

 

Portugalgo errepublikako lehen presidentea izen zen Manuel de Arriagak (1840-1917) Altzako Arriaga oinetxean zituen ahaideak. 1625an jaiotako Salvador de Arriaga hain zuzen ere bere arbasoa zen.

Manuel de Arriaga XX. mende hasieran. Argazkia: Wikimedia Commons

https://commons.wikimedia.org/wiki/File:Manuel_de_Arriaga_-_Fotografia_Vasques.png

 

Harria parkearen izendapena 1996ko otsailaren 19an onartu zen.

 

 

85. BASOZABAL BIDEA / CAMINO DE BASOZABAL

Auzoak: Martutene, Miramon-Zorroaga

 

Basozabal bidea Okendotegi bidean hasten da, ibaiaren beste aldean Astigarragako Bidebitarte industrialdea dagoelarik. A-15 eta AP-8 autobideak zeharkatzen ditu bideak, gainetik eta azpitik.

 

 

Basozabal bideak goranzko bidea hartzen du, izen bereko golf zelaiaren eremua eskubian utziz, eta Goiaztxiki bidean amaitzen da.

 

 

Bertan dagoen Basozabal baserriak ematen dio izena bideari.

 

 

Basozabal bidearen erdialdean Aizmendi zabortegia dago.

Basozabal bidearen izendapena 1988ko martxoaren 23an onartu zen.

 

84. RIKARDO IZAGIRRE PLAZA / PLAZA DE RICARDO IZAGIRRE

Auzoa: Amara Berri

Rikardo Izagirre plaza Caracasko Errege Konpainia Gipuzkoarraren kalearen, Ternuako Arrantzaleen kalearen eta Zorroaga pasealekuaren artean dago.

Rikardo Izagirre Epalza 1902an jaio zen Donostian. Kazetari eta idazlea zen. El Pueblo Vasco egunkarian idazten zuen 'Tristan de Izaro' goitizenarekin. Euskalerriaren Alde eta RIEV aldizkarietan eta Euskalerriaren Adiskideen Elkartearen buletinean ere argitaratu zituen artikuluak.

Rikardo Izagirre. Argazkia: Auñamendi Eusko Entziklopedia.

https://aunamendi.eusko-ikaskuntza.eus/eu/izaguirre-epalza-ricardo-de/ar-56617/argazkiak/

Donostiako historia eta toponimia aztertu zituen. Bereak dira El Urumea y los puertos donostiarras (1933), Estudios acerca de la Bahía de San Sebastián (1933) eta Historia y Toponimia donostiarras (1951) besteak beste. 1971ko martxoaren 30ean hil zen Donostian.

El Urumea y los puertos donostiarras liburuaren azala. Irudia: Gipuzkoako Foru Aldundiko biltegi digitala

https://dokumeta.gipuzkoa.net/handle/10690/103347?locale=eu

Rikardo Izagirre plazaren izendapena 1993ko ekainaren 15ean onartu zen.