26. ERIZAINEN PLAZA / PLAZA DE LAS ENFERMERAS

Auzoa: Gros

Zurriola pasealekuaren, Jesus Maria Leizaola pasealekuaren eta Kursaaleko eraikinen artean dagoen eremua da.

 

 

Erizaintza, gaixo eta ezinduen zaintza helburutzat dituen diziplina eta lanbidea da, bai modu autonomoan eta baita medikuekin lankidetzan ere. Florence Nightingale (1820-1910) izan zen erizainza modernoaren oinarriak ezarri zituena.

Florence Nightingale 1860 aldera. Argazkia: Wikipedia https://commons.wikimedia.org/wiki/File:Florence_Nightingale_(H_Hering_NPG_x82368).jpg

 

SATSE erizainen sindikatuak Donostiako Udalari eskatu zion erizainen plaza sortzea, OMEk 2020a Erizainaren eta Emaginen Nazioarteko Urtea izendatu zuelako eta erizainek SARs-CoV-2 birusaren aurrean egindako lana omentzeko.

Erizain bat COVID-19 gaixotasuna duen paziente bat prestatzen ZIU unitate batean prozedura mediku batetarako. Irudia: Wikipedia. https://commons.wikimedia.org/wiki/File:COVID-19_Nurse.jpg

 

2020ko uztailak 23ko udalbatzarrean onartu zen erizainen plazaren izendapena eta 2020ko irailak 23an inauguratu zen eremu hau izendapen berri honekin.

https://www.donostia.eus/secretaria/AsuntosPleno.nsf/vResolutivaId/82029AC1C053A062C12585A500367146?OpenDocument&id=C511345&idioma=cas

Erizainen plazaren izendapena onartzen den udalbatzarra. 2020ko uztailak 23 (24 minutu 41 segundutik aurrera).

https://irutxulo.hitza.eus/2020/09/23/erizainen-plazaa-inauguratu-dute/

25. PIO BAROJA PASEALEKUA / PASEO DE PÍO BAROJA

Auzoak: Antiguo / Aiete

Pio Baroja pasealekua Mikelete pasealekuan hasten da, Antiguako San Sebastian martiriaren elizaren atzean.

 

 

 

Lazkano biribilgunean amaitzen da pasealeku hau.

Pio Baroja Nessi Donostiako Okendo kaleko 6 zenbakian jaio zen 1872ko abenduak 28an, familia aberats batean. Medikuntza ikasi zuen eta Zestoan egon zen mediku urtebete inguru, baina lanbidea utzi eta Madrilera joan zen bertan familiak zuen okindegi baten kargu hartuta.

 

 

Madrilen hainbat egunkari eta aldizkaritan artikuluak idatzi zituen. Espainia eta Estatu Batuen arteko gerraren garaia zen hura. Anarkismoaren aldeko izan zen garai hartan Baroja. Madrilgo literatura munduan sartu zen, Rodrigo de Maeztu eta Azorin izan zituen adiskide.

Pio Baroja 1912ko aldizkari batean. Argazkia: Wikipedia

https://commons.wikimedia.org/wiki/File:Pio-Baroja-1912-11-20-Mundo-Grafico.jpg

 

Europan zehar bidaia ugari egin zituen Pio Barojak eta XX. mendearen hasieran bere lehen eleberriak idatzi zituen. Anarkista eta errepublikaren aldeko izanik gaztetan, totalitarismoaren aldeko bihurtu zen beranduago. Espainiako bigarren errepublikaren kontra agertu zen.

Pio Barojaren erretratua, Joaquin Sorollak margotua 1914an. Irudia: Wikipedia

https://commons.wikimedia.org/wiki/File:Joaqu%C3%ADn_Sorolla,_Don_P%C3%ADo_Baroja.jpg

 

Espainiako Errege Akademiaren kide egin zuten 1935an. Gerra zibila familiak Beran zeukan etxean harrapatu zuen. Karlistek Doneztebera eraman zuten preso baina berehala askatu zuten eta Frantziara alde egin zuen, 1940an Madrilera bueltatu zen arte. 1956ko urriak 30ean hil zen.

Barojatarren etxea Beran. Argazkia: Wikipedia

https://commons.wikimedia.org/wiki/File:Bera_-_Itzea_Etxea_-BT-_01.jpg

Hainbat eleberri idatzi zituen Barojak. 'El mayorazgo de Labraz, 'La casa de Aitzgorri', 'La feria de los discretos', 'Los últimos románticos', 'Las inquietudes de Shanti Andia', 'La leyenda de Jaun Alzate', 'El árbol de la ciencia' eta 'Zalacaín el aventurero' adibidez.

 

 

1971ko uztailak 14an onartu zen Pio Baroja pasealekuaren izendapena. Bertan, 1971n Pio Barojaren jaiotzaren lehen ehunurteurrena ospatzean egindako Donostiako II. Eskultura Bienala irabazi zuen Nestor Basterretxearen 'Monumento a Pio Baroja' obra dago.

 

 

24. AGERRE BIDEA / CAMINO DE AGERRE

Auzoa: Miramon-Zorroaga

Bide hau Larrañategi bidean hasten da, Donostiako Ospitaletik gertu, eta Martutene alderuntz jeisten da, ia Barkaiztegi bideraino iritsi arte.

 

 

Inguruan Agerre izeneko baserri bat zegoelako, gaur egun desagertua, darama izena bide honek. 1950-1960ko hamarkadetan Agerre baserriaren lurretan eraiki zen gaur egun Donostia Unibertsitate Ospitalea den konplexua.

Donostia Unibertsitate Ospitalea. Argazkia: Wikipedia

https://commons.wikimedia.org/wiki/File:Donostia_Ospitalea.jpg

 

1988ko martxoak 23an onartu zen Agerre bidearen izendapena.

 

 

23. ERROTETA GOIKO KALEA / CALLE DE ROTETA GOIKOA

Auzoa: Altza

Erroteta Goiko kalea, Erroteta kalearen goiko partetik doa, kale honen eta Altza pasealekuaren artean.

 

 

1958an Isidro Setien Alberro arkitektoak, Casares y Cía. etxegintza taldeak bultzatuta, Roteta auzunea proiektatu zuen, Santa Barbara ermita zegoen lursailean. Roteta izena bertan izen bereko baserri bat zegoelako omen datorkio. Abizen altzatar ezaguna da Roteta.

 

 

Roteta auzunearen proiektuaren planoa. Irudia: Donostiako udala.

https://www.donostia.eus/Presidencia/ArchivoGeneralP.nsf/servirAnexoWeb.xsp?Path=%2Fhistorico%2Fh-02553-06%2Fh-02553-06%20folio%2018.pdf&unidArchiv=EBD43137F1C24BF3C1257D0F00234E48

Roteta auzunearen proiektuaren irudia. Irudia: Donostiako udala.

https://www.donostia.eus/Presidencia/ArchivoGeneralP.nsf/servirAnexoWeb.xsp?Path=%2Fhistorico%2Fh-02553-06%2Ffolio%2057%20foto.pdf&unidArchiv=EBD43137F1C24BF3C1257D0F00234E48

 

 

 

Erroteta Goiko kalearen izendapena 1982ko uztailak 8an onartu zen.