Auzoa: Erdialdea
Urbieta kalea Askatasunaren hiribidean hasten da, Miramar kalearen jarraipen bezala. Mendeurrenaren plazan bukatzen da, Prim kalearekin batera.
Juan Urbieta Hernanin jaiotako soldadua, ospetsu bihurtu zen 1525eko otsailaren 24an, Paviako guduan, etsaiengandik ihes zihoan Frantzisko I.a, Frantziako erregea zalditik erori eta soldadu honek preso hartu zuenean.
Karlos V.a enperadoreak, armarri bat esleitu eta Donejakueren Ordenako Zalduna eta zalditeria kapitain izendatu zuen. 1553ko abuztuaren 23an hil zen Hernanin. Parrokia-elizaren presbiterioaren oinean ehortzi zuten. 1813an, frantziar soldaduek bere gorpuzkinak profanatu zituzten.
Hernaniko udaletxea eta eliza. Argazkia: Wikimedia Commons
Urbieta kaleko eraikin esanguratsu bat San Martin merkatua da. Gaur egungo merkatua 2005ko irailak 25ean inauguratu zuten. Merkatal gune bat da, hainbat denda, supermerkatu eta aintzinako merkatuak zeuzkan postuak biltzen dituena.
Aintzinako San Martin merkatua 1884an eraiki zuten Jose Goikoa arkitektoak Baionako Les Halles merkatua eredu bezala hartuta proiektatu zuelarik. 2003an eraitsi zuten merkatal gune berria egiteko.
San Martin merkatua 1900 aldera. Argazkia: Wikipedia
Urbieta kalearen bukaeran, Prim kalearekin batera Mendeurrenaren plazara iritsiz, Arte Ederren antzokia dago. Ramon Kortazar arkitektoaren eraikin hau 1914an ireki zuten. Zinema aretoa, Donostiako Orfeoiaren egoitza eta Euskadiko Orkestra Sinfonikoaren entsegu lekua izan zen.
Arte Ederren antzokia 2006an. Argazkia: Wikimedia Commons.
1989tik erabilerarik gabe egon da eraikina. Hainbat polemika eta gatazkaren ondoren, gaur egun eraikina eraisten ari dira eta bere jabea den SADE enpresak bertan luxuzko hotel bat egingo dutela adierazi du.
SADE enpresaren proiektuaren irudia. Argazkia: Berria
Urbieta kalearen izendapena 1866ko irailak 12an onartu zen.
iruzkinik ez:
Argitaratu iruzkina