169. ILLARRA BIDEA / CAMINO DE ILLARRA

Auzoa: Ibaeta

Illarra bidea Berion hasten da, Aspace eta Gureak dauden eremuan. Berio pasealekura iristean eskubirako bidea egiten du Igarako industrialderuntz. Bertan, adar bat Portuetxe kalean bukatzen da, Jorge Oteiza plazaren ondoan, eta beste bat Pokopandegi kalean, Iribar kalearen parean.

 

 

Illarra bidea aintzinako Usurbilgo errepidearen parte zen. Illarra baserriaren aipamenak 1824tik ezagutzen dira. Gaur egun, Illarra bidearen 97 zenbakian Illarra erretegia aurkitzen da.

  

Illarra bidearen izendapena 1992ko azaroaren 21ean onartu zen.

 

 

168. ZUBIBERRI BIDEA / CAMINO DE ZUBIBERRI

Auzoak: Ibaeta, Añorga

 

Zubiberri bidea Tolosa hiribidearen amaieran hasten da, infernua izeneko zonaldean.

 

 

 

 

 

Aurrerago bi adarretan banatzen da. Adar bat Zuatzu poligonora doa, Errotaburu pasealekuan amaituz.

 

 

 

 

Beste adarra garbigunetik pasa eta Atotxaerrekako Patxikuene kalera doa.

 

 

Bidearen hasieran zegoen Zubiberri etxeak ematen dio izena. XIX. mende amaieran eraikia, taberna izan zen. Batzuk diote inguruan zegoen Belen etxearen kontrako izengoiti bezala infernua deitu ziotela etxeari eta beraz, zonaldeari, baina ez dago argi.

 

 

 

Martxoaren 6an hasi ziren Infernuan auzune berria eraikitzeko lanak. Bertan geratzen ziren eraikinak botatzen hasi dira eta Zubiberri etxea eraitsi dute jada.

 

 

Zubiberri bidearen izendapena 1988ko martxoaren 23an onartu zen.

 

 

 

167. PETRITEGI BIDEA / CAMINO DE PETRITEGI

Auzoa: Martutene

Petritegi bidea Martutenetik Astigarragarako errepidean hasten da, Astigarragako udalerrian, Gartziategi eta Lizeaga sagardotegien ondoren. Goruntz egiten duen bidea da, Petritegi sagardotegiruntz.

 

 

Sagardotegia pasa ondoren, ezkerrean dauden Etxetxiki eta Goikoalde etxeak dira Donostiako udalerriaren parte diren bide honetako etxe bakarrak. Bidea ondoren banatu egiten da, adar bat ur edangarrien estaziora, beste bat Txoritokieta aldera eta azkena 27. poligonora eramanez.

 

 

Petritegi bidearen izena bertan dauden baserri eta sagardotegitik dator. Baserriaren jatorria XVI. mende hasieran dago. Pedro Martinez de Igeldo, Petri Igeldokoak, Murgia jauregiko jaunari lurrak erosi zizkion eta Petritegi tolare-baserria eraiki zuen bertan.

 

Petritegi sagardotegia. Argazkia: petritegi.com

 

 

Petritegi bidearen izendapena noiz onartu zeneko aipamenik ez dut aurkitu.

 

 

166. ETARTE BIDEA / CAMINO DE ETARTE

Auzoa: Zubieta

Etarte bidea Learritza pasealekuan hasten da, Aliri bidearen amaieran. Etarte errekatik gertu igaroz, goruntz egiten du, Berridi etxearen parean Berridi bidearekin topo egiten duen arte.

 

 

Gainaunditik iparraldera dagoen parajea da Etarte. Bertan Etarteko erreka jaiotzen da, Zubietako herrigunearen mendebaldetik pasatzen dena eta Oria ibaira iristen dena, Aliriko zubitik gertu. Etarte bideko 19 zenbakian Etarte etxea kokatzen da.

 

Etarte

 

Etarteko erreka

 

Etarteko errekaren amaiera Oria ibaian

Etarte etxea

 

Etarte bidearen izendapena 2004ko ekainaren 29an onartu zen.